മതിൽക്കെട്ടുകൾ തകരുമ്പോൾ

​ചെന്നൈയിലെ തിരക്കിട്ട ജീവിതത്തിനിടയിലും വിശ്വനാഥന്റെയും രാധികയുടെയും ലോകം അവരുടെ ഏകമകൾ അശ്വതിയായിരുന്നു. ഒരു മൾട്ടി നാഷണൽ കമ്പനിയിൽ ഐ.ടി. ഉദ്യോഗസ്ഥയായ 24 വയസ്സുകാരി അശ്വതി. അച്ഛൻ വിശ്വനാഥൻ ഓട്ടോമൊബൈൽ സ്ഥാപനത്തിലെ ക്വാളിറ്റി എഞ്ചിനീയർ, അമ്മ രാധിക ഒരു പൊതുമേഖല  സ്ഥാപനത്തിലെ മേധാവി. കുടുംബത്തിന് എല്ലാവിധ സൗഭാഗ്യങ്ങളുമുണ്ട്, ഇനി വേണ്ടത് മകൾക്ക് അനുയോജ്യനായ ഒരു ജീവിതപങ്കാളിയെ മാത്രം.

ബന്ധുക്കളുടെ നിരന്തരമായ ചോദ്യങ്ങൾ കൂടിയപ്പോൾ, വിശ്വനാഥൻ അനുജന്റെ നിർദ്ദേശപ്രകാരം ഒരു പ്രമുഖ മാട്രിമോണിയൽ സൈറ്റിൽ അശ്വതിയുടെ പ്രൊഫൈൽ രജിസ്റ്റർ ചെയ്തു. കുറഞ്ഞ ദിവസങ്ങൾക്കുള്ളിൽ നിരവധി പ്രൊഫൈലുകൾ വിശ്വനാഥന് ലഭിച്ചു. കൂട്ടത്തിൽ, വിദേശത്ത് ഐ.ടി. സ്ഥാപനത്തിൽ ജോലി ചെയ്യുന്ന രാകേഷ് എന്ന യുവാവിന്റെ പ്രൊഫൈൽ വിശ്വനാഥന്റെ ശ്രദ്ധയാകർഷിച്ചു.

കൂടുതൽ അന്വേഷിച്ചപ്പോൾ, രാകേഷിന്റെ കുടുംബാംഗങ്ങളുമായി തങ്ങളുടെ കുടുംബത്തിന് പണ്ടുമുതലേ പരിചയമുണ്ടെന്ന് മനസ്സിലായി. വിശ്വനാഥൻ ഉടൻതന്നെ രാകേഷിന്റെ അച്ഛൻ രമേശുമായി സംസാരിച്ചു. രാകേഷ് കഴിഞ്ഞ അഞ്ചുവർഷമായി കാനഡയിലാണ്,  വർഷത്തിലൊരിക്കൽ നാട്ടിൽ വരും. നല്ല സ്വഭാവമുള്ള, എല്ലാവരുമായി വേഗം അടുക്കുന്ന ഒരു 'ജോളി ടൈപ്പ്' ആണ് രാകേഷ് എന്ന് രമേശ്‌  സാക്ഷ്യപ്പെടുത്തി.

"ഹാവു, എന്റെ മോൾക്ക് ചേർന്ന പയ്യൻ," വിശ്വനാഥൻ ആശ്വാസത്തോടെ നെടുവീർപ്പിട്ടു. അശ്വതിക്കും പ്രൊഫൈൽ ഇഷ്ടമായി.

​രാകേഷിന്റെ പ്രൊഫൈലിലെ ചിത്രങ്ങൾ ഒന്നുകൂടി വിശദമായി പരിശോധിക്കുമ്പോളാണ് അശ്വതിയുടെ കണ്ണുകൾ ഒരു ഫോട്ടോയിൽ ഉടക്കിയത്. കൂട്ടുകാരുമൊത്ത് ബിയർ ഗ്ലാസ്സുകൾ കൈയിലേന്തി നൃത്തം ചെയ്യുന്ന രാകേഷിന്റെ ചിത്രമായിരുന്നു അത്. അവളുടെ മനസ്സിൽ ഒരു ആശങ്കയുടെ കനൽ കത്തി. 

"അച്ഛാ, ഈ ഫോട്ടോ കണ്ടോ?" അശ്വതി ഫോട്ടോ വിശ്വനാഥനെ കാണിച്ചു. "രാകേഷ് കൂട്ടുകാരുമൊത്ത് ബിയർ കഴിക്കുന്ന ചിത്രമാണിത്."

​വിശ്വനാഥൻ സൂക്ഷിച്ചു നോക്കി. ശരിയാണ്, അതൊരു ആഘോഷത്തിന്റെ ചിത്രമാണ്.  ആ മദ്യപാനരംഗം അദ്ദേഹത്തെ അസ്വസ്ഥനാക്കി. കാരണം, അവരുടെ കുടുംബത്തിൽ മദ്യപാനം എന്നത് തീർത്തും അന്യമായ ഒരു ശീലമാണ്. മദ്യപാനികളെ അകറ്റി നിർത്തുന്ന കർശനമായ നിലപാടായിരുന്നു അവർക്ക്.

ഉടൻതന്നെ വിശ്വനാഥൻ രമേശനെ ഫോണിൽ വിളിച്ചു. "രമേശ്, ഞാൻ രാകേഷിന്റെ പ്രൊഫൈലിൽ ഒരു ഫോട്ടോ കണ്ടു. അവൻ കൂട്ടുകാരുമൊത്ത് ബിയർ കഴിക്കുന്ന ഒരു ചിത്രമാണത്. രാകേഷിന് അങ്ങനെയുള്ള ശീലങ്ങൾ എന്തെങ്കിലുമുണ്ടോ? കാരണം, ഞങ്ങളുടെ കുടുംബത്തിൽ ആർക്കും മദ്യപാനശീലമില്ല, അത് ഞങ്ങൾക്ക് ചേരുന്നതുമല്ല."

​രമേശിന്റെ മറുപടി പെട്ടെന്നായിരുന്നു, "അങ്ങനത്തെ ഒരു ശീലവും രാകേഷിനില്ല, ചേട്ടാ. അതവന്റെ കൂട്ടുകാരുമൊത്ത് തമാശയ്ക്ക് എടുത്ത ഫോട്ടോയായിരിക്കും.

വിശ്വനാഥൻ പറഞ്ഞു, "എങ്കിൽ പ്രശ്നമില്ല. ഇനി അഥവാ എന്തെങ്കിലും ശീലമുണ്ടെങ്കിൽ, നമുക്ക് ഈ ആലോചന ഇവിടെ വെച്ച് അവസാനിപ്പിക്കാം. വിവാഹം നിശ്ചയിച്ചിട്ടൊന്നുമില്ലല്ലോ."

​രമേശ് ഉറപ്പിച്ചു പറഞ്ഞു, "ഒരുകാരണവശാലും ഈ ആലോചന നിർത്തേണ്ട ആവശ്യമില്ല. യാതൊരു പ്രശ്നങ്ങളുമില്ല. എന്റെ ഉറപ്പ്."

​രമേശിന്റെ ഉറപ്പിൽ വിശ്വനാഥന് ആശ്വാസമായി. അധികം വൈകാതെ അശ്വതിയുടെയും രാകേഷിന്റെയും വിവാഹം നടന്നു.   മൂന്നുമാസത്തിന് ശേഷം നാട്ടിലെ ജോലി രാജിവെച്ചു അശ്വതിയും രാകേഷും  കാനഡയിലേക്ക് യാത്രയായി.

​ആദ്യമൊക്കെ ദിവസേന വിളിച്ചിരുന്ന അശ്വതി, പിന്നെപ്പിന്നെ ഒരാഴ്ചയിലൊരിക്കലും, പിന്നെ രണ്ടാഴ്ചയിലൊരിക്കലും മാത്രമായി വിളിക്കുന്നത് കുറഞ്ഞു. വിശ്വനാഥൻ ആ മാറ്റം ശ്രദ്ധിച്ചിരുന്നെങ്കിലും പുതിയ ജീവിതത്തിരക്കുകൾ കൊണ്ടാണെന്ന് ആശ്വസിച്ചു. മൂന്നുവർഷം കടന്നുപോയി. 

​ഒരു ദിവസം, അപ്രതീക്ഷിതമായി അശ്വതിയുടെ വിളി വന്നു. അവളുടെ ശബ്ദത്തിലെ പന്തികേട് വിശ്വനാഥൻ തിരിച്ചറിഞ്ഞു.

​"അച്ഛാ!" അവളുടെ വിളിയിൽ ഭയവും ദുഃഖവും നിറഞ്ഞിരുന്നു.

എന്താ മോളെ? എന്തുപറ്റി? നിന്റെ ഒച്ച എന്താ വല്ലാതെ ഇരിക്കുന്നത്? അയാൾ അന്വേഷിച്ചു.

അച്ഛാ, ഇവിടെ രാകേഷ് ഒരു വല്ലാത്ത അവസ്ഥയിലാണ്.  ഞാൻ അതുകൊണ്ടാണ് അച്ഛനെ വിളിച്ചത്. അവൾ പറഞ്ഞു.

 എന്തുപറ്റി രാകേഷിന്? വിശ്വനാഥൻ ചോദിച്ചു.

 അച്ഛാ,  രാജേഷ് ഇവിടെ  നിത്യവും കള്ളുകുടിയാണ്. ഇപ്പോൾ വന്നുവന്ന്  എന്റെ സ്വഭാവത്തെ പറ്റി ഓരോന്ന് പറയാനും തുടങ്ങി.  ഇടയ്ക്ക് ദേഹോപദ്രവവുമുണ്ട്.  എന്ത് ചെയ്യണമെന്ന് ഒരു രൂപവുമില്ല.

 വിശ്വനാഥന്  ഒരു ഇടിത്തീ വന്നു തലയിൽ വീണത് പോലെ തോന്നി. താൻ സംശയിച്ച കാര്യങ്ങളാണല്ലോ ദൈവമേ ഇപ്പോൾ യാഥാർത്ഥ്യമായിരിക്കുന്നത്. അയാൾ ഓർത്തു.

 നീ എന്നോട് എന്തുകൊണ്ട് ഇത് നേരത്തെ  പറഞ്ഞില്ല? നിങ്ങളുടെ കല്യാണം കഴിഞ്ഞിട്ട് ഇപ്പോൾ മൂന്നുവർഷത്തോളം കഴിഞ്ഞില്ലേ?

 അച്ഛാ, ഞാൻ ആദ്യമൊക്കെ ഇതൊരു തമാശയായി കരുതി. പിന്നെപ്പിന്നെ ഇത് രാകേഷിന് ഒഴിവാക്കാൻ പറ്റാത്ത കാര്യമാണെന്ന് മനസ്സിലായി. അച്ഛൻ എന്നെ സഹായിക്കണം. അവൾ കരഞ്ഞുകൊണ്ട് പറഞ്ഞു.

 രമേശിനെ ഇന്നുതന്നെ കണ്ടു ചോദിക്കണം. അവനോട് ഞാൻ എത്രയോ പ്രാവശ്യം സംസാരിച്ചതാണ് ഈ കാര്യത്തെപ്പറ്റി. എന്നിട്ട് അവൻ എന്താണ് പറഞ്ഞത്. 

 വിശ്വനാഥൻ കാര്യങ്ങളെല്ലാം രാധികയോട് പറഞ്ഞു. രാധികക്ക് ഒന്നും തന്നെ വിശ്വസിക്കാൻ പറ്റിയില്ല. അവൾ ഭ്രാന്തെടുത്തു കരയാൻ തുടങ്ങി.

 ഞാൻ ഒന്ന് രമേശിനെ കണ്ടു വരാം. വിശ്വനാഥൻ രാധികയോട് പറഞ്ഞു. 

 എടോ രമേശാ, വിശ്വനാഥൻ രമേശിനെ വിളിച്ചു. അകത്തിരുന്ന  രമേശൻ വിശ്വനാഥന്റെ വിളികേട്ട് ഓടി പുറത്തേക്ക് വന്നു.

 ആ!  വിശ്വൻ ചേട്ടനോ, എന്താ വിശേഷിച്ച്? രമേശൻ ചോദിച്ചു.

 വിശ്വനാഥൻ രമേശിന്റെ കോളറിൽ കയറി പിടിച്ചു. നിന്നോട് രാകേഷിന്റെ സ്വഭാവത്തെക്കുറിച്ച് ഞാൻ എത്ര പ്രാവശ്യം ചോദിച്ചതാണ്? അവന് മദ്യപാനമോ അങ്ങനെ എന്തെങ്കിലും ദുശ്ശീലങ്ങളോ ഉണ്ടോ എന്ന് ഞാൻ പലവട്ടം  നിന്നോട് ചോദിച്ചതല്ലേ? എന്നിട്ട് നീ എന്താണ് എന്നോട് പറഞ്ഞത്? അവര് കളിയായിട്ട് എടുത്തതാണ് ആ ഫോട്ടോ. അങ്ങനെ ഒരു ശീലവുമില്ല എന്നൊക്കെയല്ലേ പറഞ്ഞത്? 

എന്റെ മോള് ഇതാ കരഞ്ഞുകൊണ്ട് എന്നെ ഫോൺ ചെയ്തിരിക്കുന്നു അവന് ദിവസവും  മദ്യമില്ലാതെ ഒരു നേരം പോലും  തള്ളിനീക്കാൻ വയ്യാണ്ടാണെന്ന്.  ഇപ്പോൾ വന്നുവന്ന് എന്റെ മോളെ ദിവസവും 

 ഉപദ്രവിക്കലാണ് അവന്റെ പരിപാടി. എന്റെ മോളുടെ ഭാവി തുലച്ചു കളഞ്ഞ നിനക്കും നിന്റെ മോനും തക്കതായ ശിക്ഷ ഞാൻ വാങ്ങി തരുന്നുണ്ട്. വിശ്വനാഥൻ പറഞ്ഞു.

 രമേശൻ അയാളുടെ കാലിൽ തൊട്ട് പറഞ്ഞു. സത്യമായിട്ടും അവന് ഇങ്ങനെ ഒരു ശീലമുണ്ട് ഞാൻ അറിഞ്ഞിരുന്നില്ല. എന്നോട് നിങ്ങൾ  പൊറുക്കണം. 

പൊറുക്കാനോ,  ഇതിന് എന്ത് ശിക്ഷയും സ്വീകരിക്കാൻ നിങ്ങളും മകനും തയ്യാറായിരുന്നുകൊള്ളൂ! പല്ലിറുമിക്കൊണ്ട് വിശ്വനാഥൻ അവിടെനിന്നും പോന്നു.

​വിശ്വനാഥന്റെ ഉപദേശം അനുസരിച്ച്, അശ്വതി കാനഡയിലെ സോഷ്യൽ സെക്യൂരിറ്റി ഡിപ്പാർട്ട്മെന്റിൽ രാകേഷിനെതിരെ പരാതി ഫയൽ ചെയ്തു. പോലീസ് അന്വേഷണത്തിൽ രാകേഷ് ദിവസവും മദ്യപിക്കുകയും അശ്വതിയെ ഉപദ്രവിക്കുകയും ചെയ്യുന്ന കാര്യം സത്യമാണെന്ന് ബോധ്യപ്പെട്ടു. രാകേഷിനെ ഉടൻ തന്നെ കൗൺസിലിങ്ങിനും ഡീ-അഡിക്ഷനും വേണ്ടി പോലീസ് കസ്റ്റഡിയിലെടുത്തു.

​രാകേഷിന്റെ അറസ്റ്റോടു കൂടി വിശ്വനാഥനും രാധികയ്ക്കും വലിയ ആശ്വാസമായി. അശ്വതിക്ക് നിയമപരമായ എല്ലാ സഹായങ്ങളും നൽകി. രാകേഷിന്റെ അച്ഛൻ രമേശ്, വിശ്വനാഥന്റെ വീട്ടിലെത്തി മാപ്പ് പറയുകയും രാകേഷിന് ചികിത്സ നൽകി മകനെ നേർവഴിക്ക് കൊണ്ടുവരുമെന്ന് ഉറപ്പ് നൽകുകയും ചെയ്തു. എന്നാൽ, രാകേഷിന് സംഭവിച്ച ഈ മാറ്റം അശ്വതിയെ സംബന്ധിച്ചിടത്തോളം മാനസികമായി ഒരുപാട് ബുദ്ധിമുട്ടുകൾ ഉണ്ടാക്കിയിരുന്നു.

​പോലീസ് നടപടികളും ഡീ-അഡിക്ഷൻ സെന്ററിലെ ചികിത്സയും രാകേഷിന്റെ ജീവിതത്തിൽ ഒരു വഴിത്തിരിവായി. ആദ്യമൊക്കെ എതിർത്തെങ്കിലും, ഡോക്ടർമാരുടെയും കൗൺസിലർമാരുടെയും സഹായത്തോടെ രാകേഷ് തന്റെ തെറ്റ് മനസ്സിലാക്കുകയും മദ്യപാനം നിർത്താൻ ആത്മാർത്ഥമായി ശ്രമിക്കുകയും ചെയ്തു. താൻ കാരണം അശ്വതിക്ക് ഉണ്ടായ വിഷമത്തിലും, തന്നെ വിശ്വസിച്ച് സ്വന്തം ജീവിതം ഏൽപ്പിച്ച കുടുംബത്തോട് ചെയ്ത ദ്രോഹത്തിലും രാകേഷിന് വല്ലാത്ത കുറ്റബോധം തോന്നി.

​ഇതിനിടയിൽ അശ്വതിക്ക് കാനഡയിൽ തൻ്റെ ഐ.ടി ജോലിയിൽ കൂടുതൽ ശ്രദ്ധ കേന്ദ്രീകരിക്കാൻ സാധിച്ചു. അവൾക്ക് ജോലിയിൽ പ്രമോഷൻ ലഭിക്കുകയും കൂടുതൽ ഉത്തരവാദിത്തപ്പെട്ട സ്ഥാനത്തേക്ക് എത്തുകയും ചെയ്തു. കൗൺസിലിങ്ങിലൂടെയും നിയമോപദേശത്തിലൂടെയും, വൈകാരികമായി അവൾ കൂടുതൽ ശക്തിപ്പെട്ടു.

​രാകേഷ് ചികിത്സ പൂർത്തിയാക്കി പുറത്തിറങ്ങുമ്പോൾ, അശ്വതി ഒരു നിർണായക തീരുമാനം എടുത്തിരുന്നു. രാകേഷിനോട് വ്യക്തിപരമായി അവൾക്ക് ഒരു വിദ്വേഷവും ഉണ്ടായിരുന്നില്ല, പക്ഷേ മദ്യത്തിന് അടിമപ്പെട്ട ഒരു വ്യക്തിയുമായി ഇനി ഒരുമിച്ച് ജീവിക്കാൻ അവൾക്ക് സാധിക്കില്ലായിരുന്നു. തന്നെ ഉപദ്രവിച്ച ആ ഭയത്തിൽ നിന്ന് അവൾക്ക് പുറത്തുവരേണ്ടതുണ്ടായിരുന്നു.

​രാകേഷ് അശ്വതിയെ കണ്ട് സംസാരിച്ചു.  തന്റെ തെറ്റുകൾ തുറന്നു സമ്മതിച്ച്, മാപ്പ് ചോദിച്ചു. ഇനി ഒരിക്കലും മദ്യപാനം തുടങ്ങില്ലെന്ന് സത്യം ചെയ്തു.

​"രാകേഷ്, ഈ മൂന്ന് വർഷം എന്റെ ജീവിതത്തിലെ ഏറ്റവും ഭയാനകമായ കാലഘട്ടമായിരുന്നു. ഞാൻ ഒറ്റയ്ക്ക് മുന്നോട്ട് പോകാൻ തീരുമാനിച്ചു. നിങ്ങൾക്ക് നല്ലൊരു ജീവിതം ഉണ്ടാകാൻ ഞാൻ ആത്മാർത്ഥമായി പ്രാർത്ഥിക്കുന്നു. ഒരു നല്ല സുഹൃത്തായി നമുക്ക് ഇനിയും തുടരാം, പക്ഷേ ഭാര്യാഭർത്താക്കന്മാരായി മുന്നോട്ട് പോകാൻ എനിക്ക് കഴിയില്ല."

​അശ്വതിയുടെ വാക്കുകൾ കേട്ട് രാകേഷ് നിശ്ശബ്ദനായി. അവൾ പറഞ്ഞത് സത്യമാണ്. താൻ ഉണ്ടാക്കിയെടുത്ത സാഹചര്യമാണിത്. അവൻ ആ തീരുമാനത്തെ മാനിച്ചു.

​അങ്ങനെ, അശ്വതി നിയമപരമായി വിവാഹബന്ധം വേർപെടുത്തി. വിശ്വനാഥനും രാധികയും മകളെ ചേർത്തുപിടിച്ച് ആശ്വസിപ്പിച്ചു. സ്വന്തം കാലിൽ ഉറച്ചുനിന്ന്, കാനഡയിൽ തൻ്റെ ഐ.ടി കരിയറിൽ കൂടുതൽ ഉയരങ്ങൾ കീഴടക്കി അശ്വതി മുന്നോട്ട് പോയി.

​വർഷങ്ങൾക്ക് ശേഷം, മദ്യപാനം പൂർണ്ണമായി ഉപേക്ഷിച്ച്, തികച്ചും മാറിയ ഒരു മനുഷ്യനായി രാകേഷ് ഇന്ത്യയിൽ തിരിച്ചെത്തി. താൻ ചെയ്ത തെറ്റുകൾക്ക് പ്രായശ്ചിത്തം ചെയ്ത്, മാതാപിതാക്കളുടെ കൂടെ ഒരു പുതിയ ജീവിതം തുടങ്ങി.

​താൻ തിരഞ്ഞെടുത്ത കരിയറിൽ സന്തോഷവതിയായി, സ്വതന്ത്രയായി, ആരെയും ആശ്രയിക്കാതെ ജീവിക്കാൻ അശ്വതിക്ക് കഴിഞ്ഞു. വിശ്വനാഥൻ സന്തുഷ്ടനായിരുന്നു. മകൾ സ്വന്തം തീരുമാനങ്ങളെടുക്കാൻ പ്രാപ്തയായി, ആരുടെയും സഹായമില്ലാതെ ജീവിതത്തിൽ വിജയം നേടാൻ പഠിച്ചിരിക്കുന്നു. തെറ്റായ ബന്ധത്തിൽ നിന്ന് പുറത്തുവരാൻ അവൾ കാണിച്ച ധൈര്യമായിരുന്നു അവരുടെ ഏറ്റവും വലിയ അഭിമാനം.

​ജീവിതത്തിൽ താൽക്കാലികമായി സംഭവിച്ച ഒരബദ്ധമായിരുന്നു ഈ വിവാഹം എന്ന് കരുതി അശ്വതി ആ ദുരനുഭവത്തെ മറികടന്നു. ഭയപ്പെട്ട് ഒളിച്ചിരിക്കാതെ, തന്റെ അവകാശങ്ങൾക്കായി ശബ്ദമുയർത്താനും പുതിയൊരു ജീവിതം കെട്ടിപ്പടുക്കാനും അവൾ കാണിച്ച ധൈര്യം മറ്റുള്ളവർക്ക് ഒരു പാഠമായി.

V C Ajayakumar 

28/11/2025.